၂၀၂၀ ရွေးကောက်ပွဲအတွက် အန်အယ်ဒီပါတီက စီးပွားရေးလုပ်ငန်းရှင်များထံမှ အလှူခံခိုင်းထားခြင်းမရှိဟုဆို
ရန်ကုန်၊ဇူလိုင် ၂၅
အမျိုးသားဒီမိုကရေစီအဖွဲ့ချုပ်လွှတ်တော်ကိုယ်စားလှယ်တစ်ချို့အား ၂၀၂၀ ရွေးကောက်ပွဲအတွက် စီးပွားရေးလုပ်ငန်းရှင်များထံမှ အလှူခံခိုင်းမှုမျိုးကိုပါတီမှ ပြုလုပ်ရန် ညွှန်ကြားထားခြင်းမရှိကြောင်း အမျိုးသားဒီမိုကရေစီအဖွဲ့ချုပ်၏ ပြောရေးဆိုခွင့်ရှိသူ ဒေါက်တာမျိုးညွန့်က ပြောသည်။
လက်ရှိတွင် စီးပွားရေး လုပ်ငန်းရှင်များထံမှ လွှတ်တော်ကိုယ်စားလှယ်တစ်ချို့သည် ၂၀၂၀ ရွေးကောက်ပွဲပါတီ ရန်ပုံငွေအဖြစ် ကောက်ခံခြင်းမျိုးရှိနေကြောင်း သတင်းများထွက်ပေါ်လာမှု နှင့် ပတ်သက်၍ ၎င်းက အထက်ပါအတိုင်းပြောကြားခဲ့ခြင်းဖြစ်သည်။
” ကျွန်တော်တို့အနေနဲ့ ဘယ်သူကိုမှ အဲ့ဒီလို အလှူခံခိုင်းတာလည်းမရှိပါဘူး တကယ်လို့ သူတို့ အနေနဲ့ လှူမှသာ ကျွန်တော်တို့အနေနဲ့ လက်ခံတာပဲရှိတာပါ” ဟု ဒေါက်တာမျိုးညွှန့်က ပြောသည်။
အဆိုပါသတင်းများ နှင့် ပတ်သက်၍ တိကျသော သတင်းပေးတိုင်ကြားမှုများရှိပါက ငွေကြေးကောက်ခံသည့် ကိုယ်စားလှယ်များကို ထိရောက်စွာအရေးယူသွားမည်ဖြစ်ကြောင်း ၎င်းကဆိုသည်။
” ကျွန်တော်တို့ အလုပ်မှုဆောင်အစည်းအဝေးဆုံးဖြတ်ချက်လည်းမပါဘူး။အလှူခံဖြတ်ပိုင်းလည်း မပေးပဲ ကောက်ခံမယ်ဆိုရင် ပါတီစည်းကမ်းဖောက်ဖျက်တာပဲဖြစ်ပါတယ်။ ဒါတွေကို အချက်အလက် တိတိကျကျ တိုင်ကြားလာမယ်ဆိုရင် ပါတီစည်းကမ်းအရ အရေးယူမှာပဲဖြစ်ပါတယ်” ဟု ဒေါက်တာမျိုးညွှန့်က ပြောသည်။
အမျိုးသားဒီမိုကရေစီအဖွဲ့ချုပ် ပါတီအနေဖြင့် လာမည့် ၂၀၂၀ ရွေးကောက်ပွဲတွင် သုံးစွဲမည့်ငွေကြေးများ နှင့် ပတ်သက်၍ သီးသန့်ထားရှိမျိုးရှိကြောင်း ပြီးခဲ့သည့် လပိုင်းက ပါတီ ဒုဥက္ကဌက မီဒီယာများ နှင့်တွေ့ဆုံရာတွင် လည်းပြောဆိုထားမှုရှိသည်။
credit-နိုင်နိုင်း
